नेपालको जेठो कर्णाली प्राविधिक शिक्षालय जुम्लाले कोरोना संक्रमणको अवस्थालाई मध्येनजर गर्दै भर्चुअल कक्षा सञ्चालन गर्न लागेको छ । कोभिड–१९ संकट व्यवस्थापन समिति जुम्लाको बैठकले जुम्लाका विद्यालय,कलेज,ट्युशन सेन्टर र शिक्षालय बन्द गर्ने निर्णय गरेपछि विकल्पका रुपमा भर्चुअल कक्षा सञ्चालन गर्न लागेको हो ।
शिक्षा कार्यालयका प्रमुख टेकेन्द्र थापाले कोभिड–१९ संकट व्यवस्थापन समितिको बैठकको निर्णय अनुसार विद्यार्थीलाई घर पठाइसकिएको बताए । उनले भने ,‘विद्यार्थी घर फर्किसकेका छन् । उनीहरुको घर गएपनि अधिकांस समय अध्ययनमा खर्च होस भन्ने हेतुले भर्चुअल कक्ष सञ्चालन गर्न थालिएको हो ।
गत वर्ष लकडाउनका कारण शिक्षालय नखुल्दा विद्यार्थीले नपढेरै परिक्षा दिन वाध्य भए । यो वर्ष भर्चुअल कक्ष, म्यासेन्जर, भाइवर, वाट्सअपबाट पनि कक्ष सञ्चालन गर्न थालिएको हो ।
प्रमुख थापाले भने,‘ज्यान छ त जीवन छ । जीवन छैन त केही नी छैन् । त्यही भएर जहाँ रहेपनि स्वस्थ र सुरिक्षत रहँु । शिक्षा आर्जनको पक्षलाई संगै संगसंगै अघि बढाऔँ । शिक्षालयले विद्यार्थीलाई गर्न सक्ने सम्मको सहयोग गर्छ । ’
अहिले घरविदामा गएका ४० प्रतिशत विद्यार्थी भएको ठाउँमा फोनको सुविधा छैन । १० प्रतिशत विद्यार्थीसंग मोबाइल नै छैन । उनले भने,‘शिक्षालयले अनलाईन भर्चुअल कक्ष चलाउँछ, डाँडातिर गएर भएपनि, जताबाट फोन लाग्छ,अनलाइन चल्छ त्यही गएर पढ्ने व्यवस्था मिलाउनु पर्नेछ । त्यसका लागि सम्बन्धित विद्यार्थीका अभिभावकलाई भनिसकिएको छ । ’
विद्यार्थी घर पठाउनु अघि शिक्षालयले सबै अभिभावक संग फोन गरेर विद्यार्थी घर फर्किएको जानकारी गराएको थियो । विद्यार्थी घर फर्किएको छ । लकडाउन कहिले सम्म हुन्छ निश्चित छैन । छोराछोरीलाई अनलाइन लाग्ने सुरक्षित स्थानमा राख्नुहोला भनेर फोन गरेका छौँ,प्रमुख थापाले भने,‘अभिभावकले पनि प्रतिबद्धता जाहेर गर्नु भएको छ ।यो बर्ष बन्दको विकल्प खोजेर भएपनि पठनपाठनको व्यवस्थापन हुनेछ । नपढेर परिक्षामा सहभागि हुने परिपार्टीको अन्त्य हुनेछ । ’
गत बर्ष ११ दिन भएको भनिएको लकडाउनले नौ महिना बन्द गरायो । यो पटक २१ दिन बन्द गरिएको भनिएको छ । कति दिन बन्द हुने हो थाहा छैन । तर बन्दको अधिकांस समय पठनपाठनमै विताउनु होला । शिक्षालयले विद्यार्थीको पठनपठानका लागि गर्न सक्ने सबै उपाय अपनाउन तयार छ ।
कर्णाली प्राविधिक शिक्षालयका अनुसार प्रत्येक दिन ५ वटा बिषयमा अध्ययन हुनेछ । अब कापी किताबमा लाग्ने खर्चले मोवाइलमा रिर्चाज गर्नुहोस । भर्चअल,जुम बैठक, म्यासेन्जरमा सहभागि बन्नुहोस । कोर्ष अनलाइनमै पढ्नुहोस ।
सहायक प्रिन्सिपल र सम्बन्धित विषयको संयोजक संग समन्वय गरेर अनलाइन कक्षको उपयोग गर्न विद्यार्थीलाई आग्रह गरिएको छ । विद्यार्थीको हरेक दिनको रेकर्ड राख्ने व्यवस्था गरिएको छ । शिक्षकले हाजिर लगाउनेछन । डाडामा जानुस,लेक चढ्नुस तर भर्चुअल कक्षमा सहभागि हुन नछाड्नुहोस । यो शिक्षालयको अनुरोध हो,प्रिन्सिपल थापाले थपे ।
भर्चुअल बैठकमा नियमित सहभागि विद्यार्थीको मुल्यांकन पनि हुने बताए । कोरोना संक्रमणको त्रासले शैक्षिक संस्था बन्द गर्ने प्रशासनको निर्णय संगै शिक्षालयको भौतिक उपस्थितीमा पढाई बन्द हुने अवस्था आयो । नियमित पठनपाठनलाई भर्चुअल माध्यमबाट गर्न विद्यार्थीका अभिभावकहरु संग समन्वय गरिने कार्य चलिरहेको शिक्षालयले जनाएको छ ।
शिक्षक, सहायक शिक्षालय प्रमुख लगायत सबैलाई विद्यार्थीको र अभिभावकको नम्बर राखेर पठनपाठन नियमित गर्न आबश्यक सल्लाह गर्न समेत निर्देशन दिइसकेको प्रमुख थापा बताउँछन ।
कर्णालीका १० जिल्लाका सहित देशका विभिन्न जिल्लाका करिब ७ सय ३५ जना विद्यार्थी कर्णाली प्राविधिक शिक्षालयमा अध्ययनरत छन् । कोरोना संक्रमण नियन्त्रण नभए सम्मका लागि बैशाख १५ गतेबाट सबै विद्यार्थीलाई घर पठाइएको छ ।
मोबाईल छैन भनेर समस्या दर्शाउन पाइने छैन् । शिक्षालय प्रमुख थापाले भने,‘फेसबुक चलाउन, िटकटक चलाउन, महंगा लुगा कपडा लगाउन पैसा हुने अभिभावकले किनिदिने तर पढाईका लागि ८/१० हजारको मोबाईल नकिन्ने कुरै हुदैन । कडाईका साथ विद्यार्थीको पढाई अघि बढाइने छ । विद्यार्थी र अभिभावक तयारी अवस्थामा बस्न आग्रह गरिएको छ ।
अहिले कर्णाली प्राविधिक शिक्षालयमा कृषि बाली विज्ञान,फार्मेसी, वन विज्ञान, सिभिल ईन्जिनियररिङ, प्रि डिप्लोमा तह कृषि जेटिए र सबै ओभरसियर कार्यक्रमहरु संचालित अवस्थामा रहेका छन्।
