सम्मानजनक सहभागितासहित माओवादी सरकारमा जाने

  ।   २ मंसिर २०७८, बिहीबार २०:५७

नेकपा (माओवादी केन्द्र) कर्णाली प्रदेशसभा दलको बैठकले सम्मानजनक सहभागितासहित सरकारमा जाने निर्णय गरेको छ।

नेकपा (माओवादी केन्द्र) कर्णाली प्रदेशसभा दलका नेता महेन्द्रबहादुर शाहीको अध्यक्षतामा आज वीरेन्द्रनगर सुर्खेतमा बसेको दलको बैठकले मुख्यमन्त्री जीवनबहादुर शाही नेतृत्वको सरकारमा माओवादीको सम्मानजनक सहभागिताको सुनिश्चिता सत्ता साझेदार दलभित्र खोज्ने निर्णय गरेको दलका प्रमुख सचेतक ठम्मरबहादुर विष्टले जानकारी दिए।

‘आज बसेको बैठकमा माओवादीको सम्मानजनक सुनिश्चिततासहितको सहभागिता खोज्ने जिम्मा दलको नेता शाहीलाई दिने निर्णय गरिएको छ’, प्रमुख सचेतक विष्टले भने, ‘यस विषयमा उहाँ (दलको नेता)ले सत्ता गठबन्धन दलभित्र छलफल गर्नुहुन्छ।’

माओवादी केन्द्रले मुख्यमन्त्री शाही नियुक्त भएदेखि चार मन्त्रीको सुनिश्चितता खोज्दै आएको र आज पनि त्यसैमा टेकेर निर्णय गरिएको उनको भनाइ थियो। उनका अनुसार मन्त्रिपरिषद् विस्तारमा ढिलाइ भएकाले सरकारको नेतृत्व गरिरहेका मुख्यमन्त्री शाहीले तदारुकता देखाउनुपर्दछ।

माओवादीका सकेसम्म नयाँ अनुहारका प्रदेशसभा सदस्य सरकारमा जाने जनाउँदै प्रमुख सचेतक विष्टले आजको बैठकमा जनजीविकाका सवाललाई केन्द्र राखेर छलफल भएको जनाए।

सरकार गठनका लागि सत्ता गठबन्धन दलको नेतृत्वको गरिरहेको नेपाली कांग्रेसले मुख्यमन्त्रीबाहेक दुई, माओवादी केन्द्रले चार र नेकपा (एकीकृत समाजवादी) ले तीन मन्त्री हुनुपर्ने दाबी गरिरहेका छन्। प्रदेशसभा सदस्यका हिसाबले माओवादी केन्द्रका १२, नेपाली कांग्रेसका ६ र समाजवादीका तीन जना छन्।

Next Post

सुर्य डाँगीको जन्मदिनमा बालबालिकालाई शैक्षिक सामग्री

२ मंसिर २०७८, बिहीबार २०:५७
जुम्ला तातोपानी गाउँपालिका ५ श्रीनगरका सर्य डाँगीले जन्मदिनको अवसरमा बालबालिकालाई शैक्षिक सामग्री बितरण गरेका छन । उनले ३४ औँ जन्मदिनको अवसरमा गाउँमा रहेको कालिका आधारभुत विद्यालयका बालबालिकालाई शैक्षिक सामग्री वितरण गरेका हुन् । विद्यालयका प्रधानाध्यापक छायादत्त खत्रीले ८० जना बालबालिका कापी, कलम,पेन्सील,कटर लगायतका शैक्षिक सामग्री बितरण गरिएको बताए । प्रत्येक […]