जुम्ला । मन्त्रालयले कर्णाली स्वास्थ्य विज्ञान प्रतिष्ठानको बहुवर्षीय गुरुयोजना अन्तर्गत शिक्षक तथा कर्मचारी आवास भवन, शैक्षिक भवन निर्णाण लगायतका कार्यक्रमका लागि राष्ट्रिय योजना आयोगले प्रस्ताव गरेको ६८ करोड रुपैयाँको बजेटमा सहमति दिएको छ ।
कुल बजेटमध्ये ४४ करोड रुपैयाँ अर्थबाट र २४ करोड रुपैयाँ प्रतिष्ठानले बेहोर्ने गरी कुल ६८ करोड रुपैयाँ बजेटका लागि सहमति दिएको हो ।
प्रतिष्ठानका रजिष्ट्रार विश्वराज काफ्लेले सभाको छैटौँ र सातौँँ बैठकबाट स्वीकृत बहुबर्षीय गुरुयोजना अन्तगर्त पहिलोचरणको शिक्षक र कर्मचारी आवास, प्रतिष्ठान देखि च्यारे चौरसम्मको बाटो र च्यारे चौरमा बेसिक साइन्स भवन बनाउनका लागि आवश्यक बजेटका लागि अर्थले सहमति दिएको बताए । उनले सामाजिक सञ्जाल फेसबुकमा स्टाटस लेख्दै विगत तीन बर्ष देखिएको प्रयास सफल भएको भन्दै यसमा सहयोग गर्ने स्वास्थ्य मन्त्रालय, राष्ट्रिय योजना आयोग र अर्थ मन्त्रालयलाई धन्यवाद दिएका छन् ।
प्रतिष्ठानका प्रशासकीय प्रमुख अमृत भण्डारीले प्रतिष्ठानका लागि शैक्षिक कार्यक्रम शुरु हुँदै जाँदा आवासीय भवन र बेसिक साइन्स भवन आवश्यक परिसकेको अवस्थामा अर्थको सहमतिपछि बजेट स्वीकृत हुनेमा विश्वस्त रहेको बताए । उनले प्रतिष्ठानको सभाबाट २०६९ सालमा ३ अर्व ५८ करोडको बहुवर्षीय गुरु योजना अघि सारिएको भन्दै पहिलो चरणमा १ अर्वको लागतमा ३ सय शैय्याको अत्याधुनिक अस्पताल भवन निर्माण गरिएको र अब स्वीकृत हुने क्रममा रहेको दोस्रो चरणको बजेटले शिक्षक तथा कर्मचारी आवास भवन तथा वेसिक साइन्स भवन बन्ने बताए । सोही बजेटबाट नयाँ भवनका जाने बाटो समेत तयार हुने बताए ।
प्रतिष्ठानको शैक्षिक कार्यक्रम फटाफट अघि बढ्दै
प्रतिष्ठानले यसबर्ष देखि विशेषज्ञ चिकित्सकका लागि अध्यापन शुरु गरेको छ । यसैबर्ष देखि ३ सिट एमडीजीपी, १ एनेस्थेसिया र १ बालरोग विषय गरी कुल ५ सिटमा पोष्ट ग्राजुएट्स तहको पढाई सञ्चालन गर्दैछ ।
अहिले त्यहाँ हेल्थ असिस्टेन्ट, ब्याचलर नर्सिङ, ब्याचलर अफ मिडवाइफ्री, व्याचलर अफ पब्लीक हेल्थ लगायतका विषयमा कक्षा सञ्चालन गरिरहेको छ ।
त्यस्तै एमबीबीएस कक्षा सञ्चालनका लागि समेत आवश्यक जोडबल गरेको छ ।
रजिष्ट्रार काफ्लेलले चिकित्सा शिक्षा आयोगले एमबीबीएसका लागि सम्भाव्यता अध्ययनका लागि छिटै नै एक टोली जुम्ला आउन लागेको बताए ।
प्रतिष्ठानले पछिल्लो समय कर्णाली सहित अन्य प्रदेशका विभिन्न जिल्ला तथा प्रदेश अस्पतालसंग समन्वय गरी आफ्ना जनशक्ति पठाई स्वास्थ्य सेवा उपलव्ध गराउन थालेको छ ।
प्रतिष्ठानका उपकुलपति प्राडा राजेन्द्रराज वाग्लेले यसबाट दुर्गम क्षेत्रका जनताका लागि गुणस्तरीय स्वास्थ्य सेवा प्राप्त गर्न सहज भएको बताए । ‘डाक्टर जान मुस्किल हुने कर्णाली तथा दुर्गमका अस्पतालमा हामीकहाँबाट चिकित्सकहरु जानुभएको छ । त्यसले जिल्लाका जनतालाई चिकित्सक चाहिँदो रहेछ भन्ने भोक जगाईदिएको छ । कतिपय ठाँउमा प्रष्तिष्ठानका चिकित्सक फर्किएपछि आफै चिकित्सक राख्न थाल्नु भएको छ । यो हाम्रा लागि समेत खुशीको कुरा हो,’ उनले भने ।
