जुम्लामा कोरोना संक्रमणका कारण एक जनाको मृत्यु भएको छ । मृत्यु हुनेमा चन्दननाथ नगरपालिका ८ की ३३ बर्षिया बाटु सुनार रहेको प्रहरीले जनाएकोछ ।
वुधबार साढे १ बजे सुनारको मृत्यु भएको प्रहरी नायब उपरिक्षक डिएसपी नरेन्द्र चन्दले जानकारी दिए । उनले भने,‘कर्णाली स्वास्थ्य विज्ञान प्रतिष्ठानमा संक्रमितको उपचार भइरहेको थियो ।उपचारका क्रममा उनको मृत्यु भयो । ’
उनी मंगलबार दिउँसो मात्र उपचारका लागि अस्पताल पुगेकी थिइन ।आरडिटी परिक्षणका क्रममा कोरोना संक्रमण देखाएको थियो । कोरोनाको तेस्रो लहरमा जुम्लामा पहिलो कोरोना संक्रमितको मृत्यु भएको हो ।
जिल्ला प्रशासन कार्यालयको तथ्यांक अनुसार तेस्रो लहरमा कुल १८५ जना संक्रमित भएकोमा एक जनाको मृत्यु भएको छ । ५ जनाको कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा उपचार भइरहेको छ ।
प्रतिष्ठानका मेडिकल रेकडर मेघराज बुढाका अनुसार तेस्रो लहरमा कर्णाली प्रतिष्ठानमा २८ जना संक्रमित भर्ना भएका थिए ।