जुम्ला,
कर्णाली स्वास्थ्य विज्ञान प्रतिष्ठान शिक्षण अस्पताल जुम्लाका उपकुलपति डा. मंगल रावल विरुद्ध शिक्षक तथा कर्मचारीहरु आन्दोलनमा उत्रिएका छन । उपकुलपति डा. रावलले पटक पटक पदाधिकारी नियुक्त गरेर प्रतिष्ठानमा आर्थिक संकट सिर्जना गरेको उनीहरुको आरोप छ ।
गएको शनिबार राति डेन्टल सर्जन प्रेनित पोखरेललाई स्कुल अफ मेडिसिनको डिनका रुपमा उपकुलपति डा. रावलले नियुक्त गरेपछि शिक्षक कर्मचारीहरु आन्दोलनमा उत्रिएका हुन । २०७७ मंसिर ९ गते प्रतिष्ठानका पदाधिकारी र कर्मचारी कल्याणकारी समाज बिच प्रतिष्ठानमा एक जना मात्र डिनको प्राब्धान राख्ने र अन्य संकायहरुमा सहायक डिनहरु राख्ने व्यवस्था गर्ने निर्णय सहित सम्झौता पत्रमा हस्ताक्षर गरिएको थियो । उक्त सम्झौता पत्र विपरित डिन नियुक्ती गरेपछि प्रतिष्ठानका शिक्षक कर्मचारीहरु आन्दोलनमा उत्रिएका हुृन ।
सम्झौता अनुसार पब्लिक हेल्थ डिन मुनिराज क्षेत्री हुंदा हुंदै अर्को डिन नियुक्त गर्नु जरुरी नभएको शिक्षक कर्मचारीहरुको ठहर छ । रजिष्टार नृपेन्द्र महत समक्ष शिक्षक कर्मचारीहरुले प्रेश विज्ञप्ति बुझाएर उपकुलपति रावलले प्रतिष्ठानको गरिमा माथि आँच आउने खालका गतिविधि गरेकोले बाध्य भएर आन्दोलनका कार्यक्रम अघि बढाउनुपर्ने अवस्था आइपरेको कर्मचारीहरुले बताएका छन ।
कर्णाली स्वास्थ्य विज्ञान प्रतिष्ठान एक पिछडिएको क्षेत्रमा स्थापित स्वायत्त संस्था हो । पिछडिएको क्षेत्रमा स्थापना भई शैक्षिक, स्वास्थ्य उपचार तथा अनुसन्धानका क्षेत्रमा फड्को मारिरहेको छ,प्रेस विज्ञप्तिमा भनिएको छ,‘उपकुलपतिको मनोमानीका कारण हाल प्रतिष्ठान आर्थिक लगायतका क्षेत्रमा संकटग्रस्त अवस्थामा गुज्रिरहेको छ । यो समग्र कर्णालीको लागि नै दु:खद सन्देश हो । ’
प्रतिष्ठानको हितमा प्रतिष्ठान तथा तत्कालीन कर्मचारी कल्याणकारी समाज विच भएको सम्झौता अनुसार कार्यकारी परिषदले समेत अवउप्रान्त एक मात्र डीन रहने निर्णय गरेको थियो । विज्ञप्तिमा भनिएको छ,‘उपकूलपति ज्यूले विविध बहाना बनाई राजनितिक दाउपेचमा परि प्रा. डा. मुनिराज क्षेत्री एक जना डीन कार्यरत हुंदा हुंदै पुन: अर्को डीन नियुक्ति गर्नु उक्त निर्णयको उलंघन भएको छ । यो सहेर बस्न सकिने अवस्था छैन । ’
कर्मचारीहरुको लचकतालाई कमजोरी ठानी यस्ता गलत कार्यहरुलाई प्रशय दिने लगायतका कार्य भएको प्रति सम्पूर्ण कर्मचारीहरुले खेद प्रकट गरेका छन । प्रतिष्ठानले कर्मचारीहरुको नियमावलीले तोकेको तलव, भत्ता तथा सेवा सुविधामा समेत वजेट अभावको बहाना गरी तोकिएको तलब र भत्ता खुवाउन सकेको छैन । दरबन्दी तेरिज पास गर्न समेत आलटाल गरेको देखिन्छ । जसका कारण प्रतिष्ठानका सयौं स्थायी शिक्षक तथा कर्मचारी बढुवा हुन बाट वञ्चित भएका छन । शिक्षक तथा कर्मचारीहरुले लोक सेवाको प्रकृयाबाट स्थायी कर्मचारी छनौटमा रोक लगाएको,सम्मानित अदालतको आदेश समेत अपहेलना गरेका जस्ता कार्यहरुले प्रतिष्ठानलाई फाईदा नगर्ने निष्कर्षमा पुगेको जनाएका छन ।
प्रतिष्ठानबाट धेरै कामहरु गलत प्रक्रियाबाट भइरहेका छन । जसले प्रतिष्ठानको बृद्धि विकास तथा स्तरउन्नतीमा नकरात्मक असर परेको छ । प्रतिष्ठानको हितविपरित पदाधिकारी स्तरबाट भएका सबै कार्यमहरु अघि नबढाउन जोडदार माग गरिएको छ ।
उपकुलपति डा. रावलले नयाँ डीन नियुक्तिको गलत निर्णय यथाशिघ्र २४ घण्टा भित्र सच्याउन माग गरिएको छ । यदि उक्त निर्णय नसच्चिए प्रतिष्ठानका संघ, संगठन र सम्पूर्ण शिक्षक तथा कर्मचारीहरु थप सशक्त आन्दोलनमा जाने चेतावनी समेत दिइएको छ ।
