जुम्ला ।
कामको शिलशिलामा भारत गएर फर्किएका जुम्ला चन्दननाथ १० पिपलगाउ‘का ४७ बर्षका मानबहादुर कामी बिचबाटोबाटै सम्पर्कविहिन भएका छन । उनी भारतको कुल्ल मनालीबाट पुस १६ गते घर जाने भन्दै हिडेका थिए । पुस ९ गते भारत पुगेका उनी बिरामी भएपछि एक हप्ताभित्रै घर फर्किएका थिए ।
भारतबाट घर हिडेको खबर गरेका उनी अहिले सम्म घर पुगेका छैनन् । उनी पत्नी देउकली कामीले एक हप्ता भित्रै घर पुग्नुपर्ने मान्छे बिचमै हराएपछि खोजी सुरु भएको बताइन् । उनले भनिन्,‘अहिले सम्म जहातही खोजी सुरु भएपनि भेटिएका छैनन् । ’
उनले पुस १५ गते उनको मामाको छोरा जयकामीको मोवाइलबाट फोन गरेर बिरामी भएको खबर सुनाएका थिए । उनले भनिन्,‘बिरामी छु । घर फर्किन्छु भन्ने खबर पायौं । तर अहिले सम्म न उनी भेटाएका छौं । नत उनी बसेको स्थान नै थाहा भएको छ । ’मानबहादुरलाई बसभाडा समेत जयकामीले दिएर पठाएका थिए ।
मानबहादुर संगै भारत देखि पातारासी २ का धनबहादुर नेपालीको परिवार पनि नेपाल फर्किदै थियो । उनीहरु घर फर्के हप्तादिन बढि भइसकेको छ । तर उनी फर्किएका छैनन् । मैले धनबहादुरको परिवारलाई सोधें,देउकलीले भनिन्,‘उनीहरुले १७ गते भारतको बरेलीमा बस बिग्रिएको र उनी त्यहीबाटै सम्पर्कमा नआएको प्रतिक्रिया दिए । ’ तर केही बेर सम्म बसवालाले मानबहादुर खोजेको र नभेटिएपछि आफ्नो परिवारमात्रै फर्किएको धनबहादुरले भनेको देउकलीले बताइन् ।
धनबहादुरलाई जिल्ला प्रहरी कार्यालयमा समेत बोलाएर सोधपुछ गरिएको थियो । उनले सोधपुछमा मानबहादुर भारतको बरेलीदेखि सम्पर्कमा नआएको बताएका थिए । मानबहादुर पहिलो पटक भारत गएका थिए । उनलाई हिन्दी भाषा समेत बोल्न आउदैन् ।
घर फर्किएको बिरामी श्रीमान सम्पर्कविहिन हुंदा परिवार नै चिन्तामा छ । उनले श्रीमानको खोजीको लागि जिल्ला प्रहरी कार्यालय जुम्लामा निवेदन दिएकी छिन । जिल्ला प्रहरी कार्यालयले उनको हुलिया सिमा नाका क्षेत्रमा पठाएको छ । भारतमा लाग्ने मोवाइल नम्बर उनले बोकेका छन । तर फोनमा समेत सम्पर्क हुन सकेको छैन । अहिले सम्म पनि सम्पर्कमा नआउदा चिन्ता बढेको छ,उनले भनिन्,‘सबै मिलेर श्रीमान खोजिदिनुस । ’
श्रीमान भेटाउने व्यक्तिहरुले ९८६८०३६०६१ मा सम्पर्क गरेर जानकारी दिन समेत देउकलीको आग्रह छ । मानबहादुर बेरोजगारी समस्याका कारण पुस नौ गएर घरबाट हिडेका थिए । उनी १३ गते भारतको कुल्लु मनाली पुगे । १४ गते उनले ज्यालामजदुरीमा काम गरे । १५ गते देउकलीलाई फोन गरेर बिरामी छु । भारतमा बस्न सक्दैन् । फर्किन्छु । ज्वरो आउने र टाउको दुख्ने समस्या दर्शाएका थिए । देउकलीले भनिन्,‘अहिले नफर्किनुहोला । दुइचार दिनमा सन्चो भइहाल्छ होला । जुम्लामा बसेर क्रृण जोहो तिर्न सकिदैन् भनेको थिएं ।
मानबहादुरको परिवारमा दुई छोरा र एक छोरी सहित श्रीमति घरमा छन । उहॉ मेरो भरोसा र आशा हुनुहुन्थ्यो,उनले भनिन्,‘अहिले सम्म पुग्नु भएको छैन । खोज्ने मान्छे पनि छैनन् । मान्छे खोज्न पठाउ‘दा लाग्ने खर्च समेत दिन सकिने अवस्था छैन । म कहॉ खोजु । कसरी पत्ता लगाउ श्रीमान । ’
घरबाट हिड्ने बेला मानबहादुरले बालबच्चा हेर्नु, दुईचार महिना पछि फर्किन्छु । चिन्ता नगर्नु भनेका थिए । उनले भनिन्,‘कमाउला भनेर हिडेका श्रीमान सम्पर्कमा हुनुहुन्न । बालबच्चा निराश छन । ’ उनले प्रहरीले काटेको हुलिया अनुसारको व्यक्ति खोजबिन गरिदिन समेत हारगुहार गरेकी छिन ।
