जुम्लाको चन्दननाथ नगरपालिका ५ स्थित खलंगा बजारमा खोलिएको अर्गानिक कोसेली घरमा आगलागी हुंदा लाखौं मुल्य बराबरको अर्गानिक सामानहरु जलेर नष्ट भएको छ । अर्गानिक पसलमा राति १ बजे विद्युत सट भएर आगलागी भएको थियो । आगलागीबाट अर्गानिक कोसेलीघर पुर्ण रुपमा जल्नुको साथै संगै जोडिएको चियापसल र उद्योग बाणिज्यसंघ जुम्लाको भवनमा सामान्य क्षति पुगेको जिल्ला प्रहरी कार्यालय जुम्लाले जनाएको छ ।
कोसेलीघरका सञ्चालक गोविन्द आचार्यले आगलागी भएको खबर राति साढे १ बजेतिर मात्रै आफुलाई थाहा भएको बताए । उद्योग बाणिज्य संघको हल संगै टॉसिएको चन्दननाथ भैरबनाथ मन्दिरको जग्गामा एक कोठाको कच्ची भवनमा अर्गानिक कोसेलीघर स्थापना गरिएको थियो । आगलागी हुंदा ३५ लाख बराबरको सामान नष्ट भएको आचार्यले बताए ।
नेपाली सेनाका अनुसार घरमा विद्युत तार सटभइ आगलागी भएको अनुमान गरिएको छ । आगलागीबाट उद्योग बाणिज्य संघको झ्याल समेत जलेको छ । नेपाली सेनाको नन्दाबक्स गण,नेपाल प्रहरी,सशस्त्र प्रहरी र स्थानीयको सक्रियतामा झण्डै डेढ घण्टामा आगो नियन्त्रणमा लिइएको थियो । नेपाली सेना नन्दाबक्स गणका उप सेनानी सन्तोष के.सीको कमाण्ड नेपाली सेना,सशस्त्र प्रहरी नायब उपरिक्षक दिपक चन्द र जिल्ला प्रहरी कार्यालय जुम्लाका प्रहरी निरीक्षक यामबहादुर बुढामगरको नेतृत्वमा टोली आगो नियन्त्रणमा खटिएको थियो ।
आगो नियन्त्रणमा चन्दननाथ नगरपालिकाको दमकल समेत प्रयोग गरिएको थियो । आगलागीबाट ४ क्वीन्टल जुम्मो,एक लाख ५० हजार दाना दाते ओखर,३० केजी स्याउको चाना,राडीपाखी,खरायोको टोपी,भोटे कपडा,गलैचा गरि ७ लाख ५० हजार मुल्य बराबरको सामान नष्ट भएको प्रहरीले नजनाएको छ ।
मार्सीचामल,सिमी,कादो,जौं,मकै,भट्मास,फापरको पिठो गरेर ४ लाख ५० हजार र जडिबुटी चिया मात्रै ३० हजार रुपैयॉ बराबरको सामान नष्ट भएको हो । दयारको तेल,ओखरको तेल गरेर ३० हजारको तेल जलेको हो । कोसेली घरभित्रको सबै सामान पुर्ण रुपमा क्षति भएको प्रहरीले जनाएको छ ।
कोसेली घर सञ्चालक आचार्यले आगलागीका कारण ठुला क्षेति पुगेको बताए । उनले भने,‘परिवार पाल्ने नै कोसेली घर थियो । आगोले सबै जलाइदियो । अब कसरी गुजारा चलाउने होला । ’ आगो नियन्त्रणका क्रममा अर्गानिक सामानहरु यत्रतत्र छरिएर राखिएको थियो । कोसेलीघरभित्रको कुनै पनि सामान काम नलाग्ने अवस्थामा रहेको उनको भनाई छ ।
