जुम्ला ।
जुम्ला तातोपानी गाउँपालिका ४ गिडिखोलाका ३५ बर्षिय कालीप्रसाद उपाध्यायको विद्युतीय करेन्ट लागेर मृत्यु भएको छ । गिडिखोला स्थित जालपादेवी विद्युत आयोजनाका संस्थापक अपरेटरका रुपमा कार्यरत उपाध्याय बुधबार सॉझ करेन्ट लागेर घाइते भएका थिए ।
वडाध्यक्ष अमरबहादुर रोकायाका अनुसार मृतक उपाध्याय विद्युतको ट्रान्सफर्मरमा झुण्डिएको अवस्थामा भेटिएका थिए । ‘स्थानीयले देखेपछि मात्र करेन्ट लागेर झुण्डिएको थाहा पाइयो’,उनले भने ।
करेन्ट लागेर घाइते उपाध्यायलाई उपचारको लागि कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा ल्याउदै गर्दा बाटोमै मृत्यु भएको जिल्ला प्रहरी कार्यालय जुम्लाले जनाएको छ । उनी पर्थेनी घट्टेगाड स्थित ७५ केभीको ट्रासफर्मरमा चढेर विजुली बनाइरहेका थिए । त्यहि बेला उनलाई करेन्ट लागेको स्थानीयले बताएका छन । वडाध्यक्ष रोकायाले भने,‘पौने ६ बजेतिर ट्रान्सफर्मरमा चढेका उपाध्याय झुण्डीएको अबस्थामा स्थानीयले देखेपछि सवैले थाहा पाए । तत्काल उपचारको लागि अस्पताल पुर्याउनले प्रयास भएपनि बचाउन सकेनौ । ’
विद्युत आयोजनाको स्थापना कालदेखिनै कार्यरत उपाध्यायको मृत्युपछि तातोपानी गाउँपालिका अध्यक्ष नन्दप्रसाद चौलागाई,विद्युत आयोजनाका अध्यक्ष दुर्गाप्रसाद पाण्डे,वडाध्यक्ष अमर बहादुर रोकायाले दुःख व्यक्त गरेका छन् । अरुलाई उज्यालो दिने क्रममा आफ्नो परिवारलाई अध्यारोमा पारेको भन्दै दुःख व्यक्त गरिएको हो ।
विद्युत आयोजनाका अध्यक्ष दुर्गा प्रसाद पाण्डेले बिजुली बनाउने क्रममा करेन्ट लागेर मृत्यु भएका उपाध्यायको योगदान संधै स्मरणीय हुने बताए ।
करेन्ट लागेर उपाध्यायको मृत्यु
खसपत्र
।
१ चैत्र २०८०, बिहीबार ०८:४१
