जुम्लाको सिँजा गाउँपालिकामा कर्मचारी अभावका कारण एकै जना कर्मचारीले ६ वडा कार्यालयको प्रशासनिक जिम्मेवारी हेर्नु परिरहेको छ । जुम्लाको सिंजा गाउँपालिका– ६ वडामा विभाजित छ । १५ पुसदेखि सवै वडाको काम एकजना सचिव दलबहादुर रोकायाले गरिरहेका छन् । एक जना कर्मचारीको भरमा ६ वटा वडा सञ्चालन गर्नु पर्दा निकै कठिन भइरहेको उनी बताउँछन् ।
कर्मचारी अभावका कारण वडा कार्यालयमा सिफारिसदेखि अन्य कामको पनि समस्या हुने गरेको दुखेसो स्थानीयको छ । अहिले गाउँपालिका भरी गरेर जम्मा एक वडा सचिव छन् । केही काम गर्न परे सचिव खोज्दै जानु पर्ने अवस्था रहेको स्थानीय रत्नविर बुढा बताउँछन् ।
वडामा रहेका अन्य सहायक कर्मचारीको सहयोगमा सिफारिस, बसाई सराई जस्ता कागजपत्र मिलाएर सचिवलाई दस्तखत गर्ने गरिएको वडा नं १ का अध्यक्ष रणबहादुर रोकाया बताउँछन । उनले भने,‘ गाउँपालिकामै कर्मचारी अपुग छन् । कर्मचारी अपुग भएपछि यसको धेरै थोरै असर जनतालाई पर्ने नै भयो । कर्मचारी नहुँदा वडा कार्यालयका कामकाज चलाउन पनि निकै कठिन छ । ’
गाउँपालिकाका ५ वडामा सचिव कार्यरत भएपनि अहिले जिल्लाबाट बाहिरिएपछि सवै वडाको जिम्मेवारी दलबहादुर रोकायाले लिएका छन । १ वडाका सचिव घरविदा, २ वडाका सचिव विरामी भएर उपचारमा रहेको सिँजा गाउँपालिकाका प्रवक्ता वडा नं. २ का अध्यक्ष नविन शर्माले बताए । अन्य वडाध्यक्ष सेवाकालिन तालिममा गएकोले अहिले वडामा सचिव नरहेको उनको भनाइ छ ।
हिउदे गाउँसभा अघि वडा तथा गाउँपालिकाको योजना सवै सम्झौता भइसकेका छन् । अहिले जिल्लामा स्थानीयबासी पनि नभएकाले विकास निर्माणका काम नहुने र चिसो भएकोले सचिव नहुदा पनि खासै समस्या हुदैन् । उनले भने,‘सिफारीस जन्म दर्ता लगायतका काम सहायक कर्मचारीको सहयोगमा एकै जना सचिवले पुरा गर्छन । ’
गाउँपालिका प्रमुख प्रशासकीय अधिकृत टेकबहादुर शाहीका अनुसार योजना सम्झौता भएपनि जुम्लामा चिसोका कारणले विकास निर्माणका काम सुरु भएका छैनन् । वडाका सचिव सेवाकालीन तालिमका लागि जिल्ला बाहिरिएका उनले बताए । वडा सचिव नहुँदा सामान्य समस्या आइरहेपनि गम्भीर समस्या नआउने उनी बताउँछन् ।