राष्ट्रियसभाका तीन सदस्यका लागि भएको निर्वाचनमा कर्णालीबाट सत्ता साझेदार दलका उम्मेदवार विजयी भएका छन्। सत्ता साझेदार दलका तर्फबाट महिलातर्फ नेपाली कांग्रेसकी दुर्गा गुरुङ, अल्पसंख्यक/अपाङ्गतातर्फ माओवादी केन्द्रका नरबहादुर विष्ट र अन्यबाट नेकपा समाजवादीका उदयबहादुर बोहरा विजयी भए।
निर्वाचन अधिकारी दुर्गाप्रसाद चालिसेका अनुसार गुरुङले दुई हजार ९७० मतभार प्राप्त गरिन् भने नेकपा एमालेकी उम्मेदवार गंगा थापाले एक हजार ४१६ मतभार प्राप्त गरिन्। यस्तै अल्पसंख्यक/अपाङ्गतातर्फ विजयी विष्टले तीन हजार ६ मतभार प्राप्त गरे भने प्रतिद्वन्द्वी एमालेका पदमबहादुर माझीले एक हजार ३९८ मतभार प्राप्त गरे।
अन्यतर्फ विजयी समाजवादीका बोहराले तीन हजार ६ मतभार प्राप्त गरे भने एमालेका चुडामणि शर्माले एक हजार ४१६ मतभार प्राप्त गरे। निर्वाचन अधिकारी चालिसेका अनुसार तीन मत बदर भएको छ। महिलातर्फका दुई र अल्पसंख्यक/अपाङ्गतातर्फको एक मत बदर भएको उनले जानकारी दिए। बदर भएका तीन वटै मत स्थानीय तहका प्रमुख/उपप्रमुखका हुन्।
कर्णाली प्रदेशमा कुल मतदाता १९१ हुन्। ति मध्ये स्थानीय तहका मेयर/उपमेयर/अध्यक्ष/उपाध्यक्षतर्फ १५६ र प्रदेशसभा सदस्यतर्फ ३५ मत हुन्। स्थानीय तहका १५६ मत मध्ये एक मत मात्रै खसेन भने प्रदेशसभा सदस्यतर्फको पनि एक मत खसेन्। स्थानीय तह मध्ये कालिकोटको तिलागुफा नगरपालिकाकी उपप्रमुख दन्ता नेपाली दुई वर्षदेखि अमेरिकामा छिन्। उनी गाउँपालिकाको सम्पर्कमा पनि छैनन्।
यस्तै प्रदेशसभामा राप्रपाको एक मत छ। राप्रपाले प्रदेश १ बाहेक अन्य मतदान नगर्ने ह्वीप जारी गरेकाले आफूले मतदान नगरेको राप्रपाकी सांसद शोशीला शाहीले बताइन्।
