जुम्लाको हिमा गाउँपालिकामा रहेको कालिका माध्यमिक विद्यालयमा विद्यालय प्रतिभा पुरस्कार अक्षयकोष स्थापना गरिएको छ । हरेक बर्ष अक्षयकोषमा संकलित रकमबाट प्रतिभा पुरस्कृत गर्ने हेतुले अक्षयकोष स्थापना गरिएको हो । प्रतिभा पुरस्कार अक्षयकोष स्थापनाको लागि अभिभावकले साथ दिएका छन । उनीहरुले ६ लाख ३३ हजार रुपैयाँ अक्षयकोषमा जम्मा गरेका हुन ।
यो अक्षयकोषले अभिभावकलाई जिम्मेवार बनाउनेछ । विद्यार्थीलाई लगनशिल बनाउनेछ । विद्यालयलाई कर्तव्यवोध गराउनेछ,नेपाली काँग्रेसका युवा नेता लक्ष्मण शाहीले भने,‘यो कोष गुणस्तरीय शिक्षाका लागि एक आधार स्तम्भ हो । ’
निर्माण व्यवसायी संघ जुम्लाका वरिष्ठ उपाध्यक्ष अभिभावक बिर्खबहादुर शाहीले एक लाख ७५ हजार एक सय ५१ रुपैयाँ अक्षयकोषमा जम्मा गरे । नेपाली कांग्रेस जुम्लाका संगठन विभाग प्रमुख लक्ष्मण शाहीले एक लाख ५१ हजार एकसय ५१ रुपैयाँ, हिमा गाउँपालिका उपाध्यक्ष हिमाली रोकायाले एक लाख पाँच हजार एकसय ५१ रुपैयाँ दिने घोषणा गरे ।
ज्येष्ठ नागरिक अगुवा मलभिम शाहीले एक लाख एक हजार एकसय एक रुपैयाँ र स्थानीय अगुवा नरबहादुर शाहीले ५१ हजार एक सय एक रुपैयाँ विद्यालयले स्थापना गर्ने प्रतिभा पुरस्कार तथा अक्षयकोषमा सहयोग गरे । हिमा १ का सचिव मानबहादुर शाहीले ५० हजार एक सय ५१ रुपैयाँ विद्यालयको अक्षयकोषमा उपलब्ध गराउने घोषणा गरेका छन । शिक्षा सवैभन्दा ठूलो सम्पति हो । विद्यालयको स्तरउन्नतिका लागि सहयोगको कमी हुन दिदैनौँ । उनले भने,‘ विद्यालय व्यवस्थापन र आर्थिक व्यवस्थापन पारदर्शी हुनुपर्छ । विद्यालयको विकासका लागि अभिभावक लागि पर्छौ । ’
हिमा गाउँपालिका उपाध्यक्ष हिमाली रोकायाले गाउँपालिकाले शिक्षा क्षेत्रमा पहिलो प्रथामिकता दिएको बताउँदै कालिका माध्यामिक विद्यालय सहित गाउँपालिकाका विद्यालयहरुको भौतिक पूर्वाधार र स्तरउन्नतिका लागि स्थानीय सरकार सकारात्मक हुदै आएको बताइन । शिक्षा विना जीवन अन्धकार झैँ हुन्छ । उनले भनिन्,‘त्यसैले सवैलाई पढाउने र गुणस्तरीय शिक्षा दिन अभिभावक, शिक्षक र विद्याथीहरुले स्पष्ट रणनिति बनाएर अगाडि बढ्न जरुरी छ । ’
नेपाली कांग्रेस जुम्लाका संगठन विभाग प्रमख लक्ष्मण शाही विद्यालयको स्तरउन्नतिका लागि सवैको सहकार्य आवश्यक रहेको बताउँछन । उनले यो विद्यालयबाट उत्पादित आश लाग्दो जनशक्ति देशका विभिन्न ओहदामा पुगेकाले भावी जनशक्तिका लागि अपुग बिषयमा गर्नुपर्ने सहयोगमा लागि पर्ने बताए । नपढेका पुर्खाले विद्यालय जन्माईदिएकोमा स्मरण गर्दै अव राम्रो गर्ने जिम्मेवारी सबैको रहेको बताए ।
विद्यालयमा ३६० छात्रा र २५१ छात्र गरि अहिले ६११ विद्यार्थी अध्ययनरत छन । विद्यालयमा प्राविधिक धार सहितका १८ जना शिक्षक दरवन्दी रहेको छ । तीनहजार ८ सय बर्गमिटर जग्गा रहेकोमा बढाउने तयारी भईरहेको छ ।