उमेश बुढा,कनकासुन्दरी,
जुम्ला कनकासुन्दरी गाउँपालिका ६ का वडाध्यक्ष जग्गीप्रसाद आचार्य सुत्केरो लिएर सुत्केरीको घरदैलोमा पुगेका छन । उनी सुत्केरी महिलालाई प्रोत्साहन स्वरुप पाँच हजार रुपैयाँ सुत्केरोको रुपमा प्रदान गर्न घरदैलोमा पुगेका हुन ।
जिल्लामा सुत्केरीलाई प्रोत्साहन स्वरुप रकम दिने पहिलो वडा हो । प्राचिन कालदेखी सिँजा क्षेत्रमा सुत्केरी महिलालाई सुत्केरो स्वरुप चामल,घ्यु,तेल,मह,मासु र अउडा लगायतका पोषिलो खानेकुरा आफन्तजनले पुर्याउने चलन छ । त्यही चलन अनुरुप वडाध्यक्ष आचार्य सुत्केरीको घरदैलोमा पुग्ने गरेका हुन ।
उनले सुत्केरीको अवस्था बुझ्ने,सुत्केरी स्याहारका बारेमा आफन्तलाई सम्झाइबुझाई गर्ने गरेका हुन । गर्भवती महिला सुत्केरी भएपनि निकै कमजोर हुन्छन । उनीहरुलाई पोषणयुक्त खानेकुराको आवश्यक पर्छ । उनले भने,‘यो कमजोर अवस्थामा पोषणयुक्त खानेकुरा किनेर खानको लागि पाँच हजार रुपैयाँ प्रति सुत्केरी उपलब्ध गरिएको हो । ’
उनले घरदैलोमा पुगेर नियमित स्वास्थ्य संस्थाको निगरानीमा रहन,स्वास्थ्यकर्मी संग बारम्वार समन्वय गर्न र पोषिलो खानेकुरा र आरामको व्यवस्थापन गर्न आग्रह गरेका हुन । यहाँका महिला सुत्केरी भएको बेला सुख्खा रोटी मात्र खाएको देख्छौँ । कार्यबोझ निकै बढेको र राम्रो संग आराम गर्न नपाएको भेटाउने गरेका छौँ । यो पटक्कै राम्रो भएन । वडाध्यक्ष आचार्यले भने,‘प्रोत्साहन रकम संगै गर्भवती र सुत्केरी भइसकेको अवस्थामा अपनाउनु पर्ने बिषयमा गम्भीर बन्न समेत सुझाव दिने गरिएको छ । ’
यो बर्ष कनकासुन्दरी ६ मा ४ गाउँ छन । गाउँमा १२ जना महिला सुत्केरी भएकी छिन । उनीहरुलाई भेटेर पाँच हजार रुपैयाँ हातमा उपलब्ध गराइएको थियो । वडाध्यक्षले उपलब्ध गराएको पाँच हजार रुपैयाँले पोषिलो खानेकुरा किनेर प्रयोग गरिरहेको सुत्केरी महिलाहरु बताउँछिन । यहाँका सबै सुत्केरी आर्थिक हिसावले निकै कमजोर हुने गरेका छन । उनीहरुलाई पोषिलो खानेकुरा पाउँदैनन । यो अवस्थामा निकै राहत पुगेको स्थानीय बताउँछन ।
वडाध्यक्षले दिएको रकमले तेल, दाल,चामल, मासु,अण्डा,प्याज, टमाटर लगायतका मरमसला किनेर प्रयोग गरिरहेको सुत्केरी महिलाका आफन्तजनहरु बताउँछन । उनीहरुले कमजोर स्वास्थ्य भएको बेला घरमै आएर सुत्केरीको हातमा रुपैयाँ थमाउदा निकै खुसी भएको सुनाएका थिए ।
वडाध्यक्ष आचार्यले नियमित गर्भजाँच गराउन,गर्भावस्थामा संवेदनशिल बन्न र स्वास्थ्य संस्थामा सुत्केरी हुनको लागि आग्रह समेत गरेका थिए ।
