जुम्लाको सिँजा गाउँपालिकामा युवाहरुले नमुना गाउँसभा चलाएका छन । उनीहरुले गाउँसभामा आर्थिक ऐन र विनियोजन विधेयक पारीत गरेका हुन । युवा नेतृत्व विकास र निर्णय क्षमता निर्माणको लागि नुमना गाउँसभा चलाइएको थियो ।
गाउँसभामा हिमा,कनकासुन्दरी र सिँजा गाउँपालिकाका ३९ जना युवा सभासदस्य भएर सहभागिता जनाएका थिए । समग्र जिल्लाको विकासको लागि युवा नेतृत्व आवश्यक छ । आगामी दिनमा स्थानीय सरकार सञ्चालन गर्ने अवसरका लागि पनि नमुना गाउँसभा गरेर युवालाई अभिमुखीकरण गरिएको थियोे । नमुना गाउँसभा ३ दिन सम्म चलेको थियो ।
गाउँसभामा युवाले बालविवाह रोक्ने बारेको सार्वजनिक महत्वको प्रस्ताव पेस गरेका थिए । उक्त प्रस्तावमा ८ जना सभासदस्यले आफ्नो धारणा राखेका थिए । उनीहरुले स्थानीय सरकारले गाउँसभा मार्फत बालविवाह रोकथाम तथा नियन्त्रण ऐन ल्याएर सचेतना अभियान चलाउनु पर्नेमा जोड दिएका थिए ।
नमुना गाउँसभामा दिपकन्या चौलागाई र धिरबहादुर अधिकारी जनप्रतिनिधिको भुमिकामा थिए । उनीहरु गाउँपालिका अध्यक्ष र उपाध्यक्षको रुपमा रहेका थिए । गाउँसभाको प्रत्यक्ष अभ्यास युवालाई गराएर नेतृत्व क्षमता विकास गर्ने हेतुले नमुना गाउँसभाको आयोजना गरिएको थियो । कुनै पनि युवा राजनीतिक नेतृत्वमा जानु अघि गाउँसभामा हुने विभिन्न क्रियाकलाप र गाउँसभा सञ्चालन प्रक्रिया र विधिका बारेमा जानकार होस भन्ने तरिकाबाट सहजीकरण गरिएको थियो ।
नमुना गाउँसभामा सिँजा गाउँपालिका अध्यक्ष देवलसिंह रावल,प्रमुख प्रशासकीय अधिकृत टेकबहादुर शाही,सिँजा ३ का अध्यक्ष तिलाचन्द्र चौलागाइँ र योजना शाखा प्रमुख पदमबहादुर भण्डारी सहभागि थिए । उनीहरुले आफुहरुले गाउँसभा सञ्चालन गर्दा गरिएका हरेक क्रियाकलापका बारेमा अनुभव सुनाएका थिए ।
नमुना गाउँसभाको सहजीकरण संघीय संसद सचिवालयका पुर्वकर्मचारी विरेन्द्रबहादुर कार्की,रमेशकुमार पौडेल र सहजकर्ता प्रशिक्षक धनराज सुनारले गरेका थिए ।
नमुना गाउँसभा निकै उपलब्धिपुर्ण रहेको सहजकर्ता प्रशिक्षक सुनारले जानकारी दिए । युवा नेतृत्व अहिलेको अपरिहार्यता हो । प्रशिक्षक सुनारले भने,‘स्थानीय सरकार सञ्चालन र गाउँसभा आव्हानका बारेमा जानकारी दिन सकेको खण्डमा निकै राम्रो हुनेछ । एक स्थानीय सरकारले गर्ने काम कर्तव्य र अधिकारका बारेमा स्पष्ट पारीएको थियो । ’
नमुना गाउँसभाले युवाहरुलाई सामुदायिक विकासमा देखिएका समस्या समाधानका लागि नेतृत्व गर्ने सीप प्रदान गरेको छ । प्लान नेपालको आर्थिक सहयोगमा आत्म सम्मानका लागि सहकार्य क्याड नेपाल जुम्लाको आयोजनामा नेतृत्व र निर्णय परियोजना अन्र्तगत नमुना गाउँसभा सञ्चालन गरेको गरिएको थियो ।
