जुम्ला,माघ ३।
ट्राफिक प्रहरी कार्यालय जुम्लाले सवारी दुर्घटना न्युनिकरण गर्न सचेतना प्रदान गर्न थालेको छ । सदरमुकाम खलंगा देखि कर्णाली राजमार्गका दुर्घटना संभावित क्षेत्रमा होडिङबोर्ड राख्ने,घुम्तीमोडमा ट्राफिक चिन्ह राख्ने र ट्राफिक नियमको पालना गर्ने बारेमा सवारीचालक र व्यवसायीलाई जनचेतना प्रदान गर्न थालेको हो । अहिले कर्णाली राजमार्गको जुम्ला खण्डमा प्रत्येक दिन ट्राफिक प्रहरीले चेकजाँच गर्न थालेको छ ।
ट्राफिक प्रहरीले ट्राफिक नियम मिच्ने सवारीचालकलाई कार्वाही मात्र गरेको छैन । उनीहरुलाई सवारी साधन चलाउदा अपनाउनु पर्ने नियमका बारेमा सचेत सिकाउने गरिएको छ । सवारी चालक अनुमति पत्र बोक्न,सवारीसाधनको बिलबुक लगायतका कागजात बोकेर हिड्न र कम गतिमा सवारीसाधन चलाउनको लागि सडकमै खटिएर ट्राफिक प्रहरी कार्यालय जुम्लाले सचेतना फैलाउदै आएको जिल्ला ट्राफिक कार्यालय जुम्लाका निमित्त प्रमुख प्रहरी सहायक निरिक्षक बिमलकुमार रावतले जानकारी दिए ।
उनले भने,‘सडकमा तीब्र गतिले सवारी साधन चलाउदा दुर्घटनाको जोखिम बढेको छ । तीब्र गतिले सवारीसाधन नचलाउन र सवारीसाधनका कागजात लिएर यात्रा गर्नको लागि सुझाव दिइदै आएका छौँ । अटेर गर्ने सवारीचालकलाई कार्वाही समेत हुने गरेको छ । पछिल्लो समयमा ट्राफिक सचेतना फैलाउन थालेपछि सवारी दुर्घटना कम हुदै गएको छ । ’
जिल्लाको सदरमुकाम खलंगाका विभिन्न चौकमा ट्राफिक प्रहरी लाग्ने गरेको छ । कर्णाली राजमार्गको तातोपानी र तिला गाउँपालिका खण्डमा नियमित चेकजाँच गर्न थालिएको हो । तीब्र गति जीवनको क्षति,ढिलो गए अवश्य पुगिन्छ,छिटो गए भन्न सकिन्न, चालकहरुले ३० को गतिमा मात्र सवारीसाधन चलाउनु पर्छ भन्ने बारेमा सिकाउँदै आएको छ ।
पछिल्लो समयमा सदरमुकाम खलंगा क्षेत्रमा सवारी पार्किङ क्षेत्र तोकेर व्यवस्थित गर्न थालिएको उनले बताए । जुम्लामा सवारी दुर्घटना न्युनिकरणको लागि लभ ३० को अवधारणा अनुसार विभिन्न स्थानमा लभ ३० का होडिङ बोर्ड राखिएको छ । प्रमुख जिल्ला अधिकारी बिजयकुमारी प्रसाई र प्रहरी नायव उपरीक्षक नरेन्द्र चन्दले सवारी साधन सञ्चालन तथा व्यवस्थापनमा सरोकारवालाले ध्यान दिनु पर्नेमा जोड दिएका छन ।
संयुक्त राष्ट्र संघका अनुसार विश्वमा प्रत्येक २४ सेकेण्डमा एक जनाको सवारी दुर्घटनामा मृत्यु हुने गरेको छ । बर्षमा १३ लाख मान्छे सवारी दुर्घटनामा परेर मर्छन । ५८ लाख मान्छे घाइते हुन्छन । २०३० सम्म नेपाललाई दुर्घटनामुक्त देश बनाउनको लागि ट्राफिक प्रहरी कार्यालयले सक्रियता देखाउदै आएको छ ।
प्रहरी सहायक निरीक्षक रावतले जुम्लामा सवारी चालक भेला गराएर,सडक आसपासका गाउँमा पुगेर र विभिन्न जनचेतनामुलक भिडियो देखाएर ट्राफिक नियमका बारेमा जनचेततना जगाउने कार्य चलिरहेको छ ।
ठाउँठाउँमा होडिङबोर्ड,घुम्ती मोडमा ट्राफिक चिन्ह
खसपत्र
।
३ माघ २०७८, सोमबार १९:२५
