जुम्ला ।
बाँकेको नेपालगन्जबाट काठमाडौँतर्फ जाँदै गरेको बस दाङको भालुबाङनिर राप्ती नदीमा खस्दा जुम्लाले पनि एक कुशल सहकारी व्यवस्थापक गुमाएको छ । जुम्ला चन्दननाथ नगरपालिका ८ का ४० बर्षिय मुनबहादुर रावतलाई गुमाएको हो । ३५ जना रहेको बसमा मुनबहादुर पनि सवार थिए ।
उनी पञ्चेश्वर बहुद्धेशीय सहकारी संस्थाका व्यवस्थापक हुन । चार दिने सहकारी लेखा सम्बन्धि तालिमका लागि सुर्खेत झरेका मुनबहादुर विभिन्न वितिय संस्थामा लोन प्रक्रियाका लागि फाइल बोकेर गएका थिए । काठमाडौंस्थित स्वरोजगार कोषमा एक करोड लोनका लागि फाइल पेस गर्नुपर्ने थियो । यसअघि स्वरोजगार कोषको ५० लाख रुपैयाँ पञ्चेश्वरले चलाएर चुक्ता गरिसकेको थियो । कोषमा लोन बढाएर बेरोजगार नागरिकलाई स्वरोजगार बनाउने लक्ष्य थियो ।
पञ्चेश्वर सहकारीका अध्यक्ष बल खत्रीका अनुसार उनीसंग सहकारीका तीनवटा फाइल थिए । सहकारी बैंक,साना किसान माइक्रो फाइनान्स र स्वरोजगार कोषको फाइल हुन । पञ्चेश्वर सहकारीका अध्यक्ष बलखत्री सिंगो जुम्लाले सहकारी अभियान्ता र कुशल व्यवस्थापक गुमाएको बताए । उनले भने,‘संधै कर्जा दिएर गरिब,निमुखाहरुको उद्यमशिलतामा जोड दिनुहुन्थ्यो । उहाँ नै बस दुर्घटनामा गुम्नु भयो । अब सहकारी व्यवस्थापक विहिन बन्यो । सहकारीकर्मीहरु टुहुरा जस्तै बनेका छन । ’
उनका अनुुसार मुनबहादुर जहाजमा जाने भन्दै सुर्खेत देखि नेपालगञ्ज हिडेका थिए । मुनबहादुर संग अन्तिम फोनकलमा कुरा भएको सुनाउदै उनले भने,‘जहाजमा मौसम खराबीका कारण जान सकिएन । बस चढें । बसको यात्रा पनि ठिकै छ भनिरहेका थिए । तर भालुवाङ दुर्घटनामा उनको निधन हुन पुग्यो ।
सहकारीको डकुमेन्टहरु सबै उनको साथमा छन । गत बर्ष मोटरसाइकल दुर्घटनामा उनको खुट्टामा चोट लागेकोले काठमाडौंको अस्पतालमा घाउ देखाउने उनको धोको थियो । स्थानीय गुरुप्रसाद चौलागाईले भने,‘न उपचार गराउन पाए । न त सहकारीको फाइल नै पेस गरे । उनको इच्छा मनमै रह्यो । ’
पञ्चेश्वरको कारोबार अहिले तीन करोड ८ लाख भन्दा बढि नै छ । कारोबारो बढाउने देखि सहकारीमा सर्वसाधारण नागरिकको पहुंच बढाउनुमा उनको भुमिका अग्रणी थियो ।
पुस महिनाको दोस्रो साता मात्रै उनले खाद्य व्यवस्था तथा ब्यापार कम्पनीसंग गाउँमा चामल बाड्न पाउने गरी सम्झौता गरेका थिए । मुनबहादुरका एक छोरा एक छोरी श्रीमति र आमाबुबा थिए । आमाबुवा ६० बर्षभन्दा माथिका छन । बुवा बिरामी भएकोले घरको सबै जिम्मेवारी मुनबहादुरको काँधमा थियो । अहिले उनको परिवार भावविह्वल बनेको छ । सिंगो श्रीढुस्का गाउँ शोकमग्न बनेको छ ।
बाग्मती प्रदेश ३००१ ख ३९१२ नम्बरको यात्रु बाहक बस अनियन्त्रित भई पुलबाट अन्दाजी २५ मिटर तल राप्ती नदीमा खसेर दुर्घटनामा परेको थियो । उक्त दुर्घटनामा परेर १२ जनाको मृत्यु भएको छ ।